Lajme Shqip Friday, 25 September 2015 15:56

Deri në fund të këtij viti, Qeveria e Kosovës pritet të miratojë Projektligjin mbi Investimet Strategjike.

Përmes tij, ekzekutivi synon të pengojë trendin rënës të investimeve të huaja dhe të tërheqë sa më shumë investitorë strategjikë në Kosovë. Por njohës të çështjeve ekonomike thonë se ky projektligj nuk është në përputhje me ligjet e BE-së dhe si i tillë, mund të ketë efekte negative.

Me qëllim të tërheqjes së investitorëve të huaj, qeveria e Kosovës është në proces të hartimit të Projektligjit mbi investimet strategjike. Përmes këtij projektligji parashihen kushte të veçanta, lehtësira dhe përshpejtim i procedurave për investitorët e huaj, thotë për Radio Kosovën Sokol Havolli, këshilltar politik i kryeministrit Isa Mustafa.

“Natyrisht do të përcaktohen kritere për fusha dhe industri specifike, siç janë kriteret e shumës së përgjithshme të investimeve, numrit të të punësuarve, gjithashtu edhe prurjes së teknologjive të reja, të cilat do të krijojnë vlerë të shtuar për ekonominë e Kosovës dhe do të ndikonin drejtpërdrejt në rritjen ekonomike dhe standardin jetësor”, thotë ai.

Njohës të çështjeve ekonomike thonë se projektligji mbi investimet strategjike mund të ndikojë në pengimin e trendit rënës të investimeve të huaja të drejtpërdrejta. Alban Zogaj nga Instituti RIINVEST, thotë se ky projektligj ka përparësitë dhe mangësitë e veta.

“Përparësitë janë që i jep një hapësirë më të madhe qeverisë për të identifikuar investitorët potencialë dhe për të diskutuar me ta direkt, dhe kjo është përparësi pasi mund të diskutojë dhe të tërheqë ndonjë investitorë të madh, por në anën tjetër pengesa mund të jetë që i jep qeverisë një diskrecion të madh dhe atëherë qeveria mund ta ketë lirinë edhe të gabojë në ndonjë situatë ose të ketë konflikt interesi”, thekson Zogaj.

Kurse drejtori i Instituti Gap Agron Demi tha se ky projektligj bie ndesh me disa ligje dhe rregullore në Kosovë, por edhe me parimet e BE-së për prokurim publik dhe rregullat e konkurrencës.

“Ne si shoqëri civile e kemi kundërshtuar procesin dhe mënyrën se si po synohet të miratohet një projektligj i tillë për shkak se qeveria e Kosovës, aktualja dhe ato të kaluarat, nuk kanë dhënë ndonjë shembull se janë të afta dhe kanë synim të drejtë kur është fjala tek dhënia e tenderëve”, thotë Demi.

Havolli thotë se ligje të ngjashme kanë edhe vendet e rajonit, dhe me miratimin e tij, edhe Kosova mund të behet shtet konkurrent në rajon. Ai theksoi se së shpejti projektligji do të dalë në diskutim publik, ndërkaq shfaqi bindjen se qeveria mund ta miratojë atë deri në fund të vitit.