Lajme Shqip Monday, 27 June 2011 12:16

Prishtinë – Në Qendrën Emergjente çdo ditë regjistrohen raste të helmuarish nga ushqimet. Autoritetet shëndetësore apelojnë te qytetarët që të shtojnë higjienën personale. Rreth 12 pacientë çdo ditë i drejtohen qendrës emergjente pasi konsumojnë ushqime jo të freskëta. Mjeku Basri Lenjani sqaron se qendra emergjente gjatë sezonit veror regjistron më tepër raste si pasojë e helmimit nga produktet ushqimore. Sipas tij, një pjesë e këtyre pacientëve dërgohen në klinikën infektive për trajtim të mëtutjeshëm.

Për tu parandaluar helmimet, Lenjani porosit qytetarët që të kenë kujdes në higjienën dhe kushtet e përgatitjes së ushqimit. Ndërkohë Valdet Gjinovci shef i Agjensionit për Ushqim dhe Veterinari tha se qytetarët e Kosovës konsumojnë ushqim të sigurt , cilësor dhe të kontrolluar. Sipas tij, qytetarët duhet të kenë kujdes vetëm në rastet kur ata vendosin të ushqehen në lokale të cilat servojnë ushqim.

“Jemi në kohën e verës ku temperaturat janë të larta, mirëpo qytetarët mund të them se konsumojnë ushqim të sigurt cilësor, të kontrolluar, shpeshherë edhe të testuar në laboratorin e Institutit Kombëtar për Shëndet Publik. Pasojat nga helmimet në kushtet e verës, zakonisht mund të vijnë nga ato lokale të cilat nuk e respektojnë higjienën dhe kushtet e punës”, tha Gjinovci.

Ai, po ashtu ka pranuar se numri i inspektorëve është mjaft i vogël për të kontrolluar të gjitha lokalet, të cilat shërbejnë ushqim. Megjithatë, ai tha se vetëm këtë vit janë konfiskuar rreth 450 ton mish të pasigurt.