Lajme Shqip Tuesday, 09 October 2012 11:38

Prishtinë – Vokalisti i grupit të njohur kosovar “NRG Band” Besnik Qaka do të gjykohet për keqpërdorim seksual të një të miture. Atij dhe gjashtë të akuzuarve të tjerë u është konfirmuar aktakuza dhe pritet që ata shumë shpejt të ulen në bankën e akuzuarve në Gjykatën e Qarkut në Prishtinë, informon emisioni Express i KTV-së.

Avokati mbrojtës i këngëtarit, Arianit Koci, ka shprehur pakënaqësinë në vendimin e gjykatës. Qaka akuzohet se ka keqpërdorur seksualisht një të mitur nën moshën gjashtëmbëdhjetë vjeçare. Ngjarja thuhet të ketë ndodhur në vitin 2008 në Prishtinë, në një motel që gjendet rrugës për në Lipjan.

Bazuar në emrin e saj, e mitura duhet të jetë shqiptare. Prokuroria e Qarkut në Prishtinë, në fillim të vitit 2012, ka dorëzuar në Gjykatën e Qarkut në Prishtinë aktakuzën kundër tij dhe gjashtë personave të tjerë. Qaka është deklaruar i pafajshëm. Nëse ai dhe të akuzuarit e tjerë shpallen fajtorë, ata mund të dënohen nga 1 deri më 10 vjet burgim.(LajmeShqip.com)