Lajme Shqip Monday, 16 July 2012 11:40

Mamaja e futbollistit multimilioner Mario Balotellit tashmë ka një punë të re për të plotësuar nevojat familjare.

Ndërkohë që në rrugët e Manchester City, futbollisti Balotelli endet me makinën e tij Bentley 120.000 paundëshe, mamaja e tij biologjike mer çdo ditë autobusin numër 11 për të shkuar në punën e saj prej pastrueseje.

Kjo është pak a shumë panorama e jetës së Super Marios dhe nënës së tij biologjike Rose Barwuah, 46 vjeç e cila e dha për adoptim djalin e saj, kur ai ishte në moshë shumë të vogël. Sipas informacioneve të besueshme Rose nuk kërkoi të takonte Marion, deri në kohën kur ky i fundit u bë një kampion.

 Nënë e bir dukej se ishin afruar së fundmi, kur Rose dhe vajza e saj e vogël Angel 13 vjeç u transferuan në qytetin anglez të Manchester për të qenë më afër sulmuesit të City-t dhe vëllait të tij Enoch.

Kampioni 21-vjeçar ka shkuar disa herë ta takojë nënën e tij në lagjen tepër të varfër të Wythenshawe. Fqinjët thonë se duket gati e pabesueshme që djali kaq i pasur të mos e ndihmojë nënën e tij që jeton në varfëri.”Kur ai vjen në lagjen tonë me makinën fantastike, të gjithë mbetemi pa frymë”, thonë fqinjët për “Sunday Mirror”. 

Megjithatë ka edhe nga ata që thonë se Rose nuk i do paratë e Marios. “Ajo është shumë besimtare, nuk përton të punojë shumë dhe gjëja e vetme që kërkon është të rikuperojë raportin me djemtë e saj”. 

 Gruaja çdo natë merr autobusin për të shkuar në punë dhe pastron zyrat e një kompanie. Burime të mirëinformuara thonë se Rose ka qëllim që të qëndrojë në Angli dhe së shpejti aty do të mbërrijë edhe bashkëshorti i saj Thomas.

Mario u dha për adoptim në moshën 2-vjeçare, pasi prindërit e tij banues në Itali, por me kombësi ganeze, kishin vështirësi të mëdha ekonomike dhe në atë kohë Mario kishte probleme të rënda me një infeksion të brendshëm që kërkon kura të njëpasnjëshme. 

Rose dhe Thomas kërkuan të riafroheshin me të birin, por nuk pati sukses. Mario, në fakt i është trembur gjithnjë faktit se qëllimi i vërtetë për t’u afruar ishte vetëm interesi ekonomik.