|
|
e Premte, 03 Gusht 2012 08:23 
Personazhi më i dashur i filmit “I vetëm në shtëpi”, Macaulay Culkin, është bërë tërësisht skllav i heroinës dhe oksikodonit, një ilaç i fortë qetësues, duke i konsumuar rregullisht të dyja substancat për 6 mijë dollarë në muaj.
Është ky lajmi i publikuar nga “National Enquirer”, sipas të cilës, shtëpia në Nju Jork e aktorit që bëri për vete mijëra shikues është kthyer në një vatër të vërtetë droge. Sipas gazetës, Culkin drogohet rregullisht, herë vetëm dhe herë në shoqërinë e miqve të tij që ashtu si ai janë të varur nga droga.
Vartësia e tij ndaj narkotikëve është intensifikuar në 18 muajt e fundit, pas ndarjes me aktoren Mila Kunis, aq shumë saqë aktori ka kaluar në overdozë dhe ka shpëtuar për një qime.
Probleme të tilla janë parë edhe më parë në familjen e tyre pasi motra e tij Jennifer Adamson vdiq në vitin 2000 bashkë me një shoqen e saj, pasi kishin konsumuar një dozë të lartë heroine.
Kur në shkurt Coulkin u shfaq i zbehtë dhe i dobët në rrugët e Nju Jorkut, shumë vetë u shqetësuan për gjendjen shëndetësore të tij dhe dyshuan se ai mund të kishte probleme me drogën. Por stafi i tij e përgënjeshtroi menjëherë një gjë të tillë, duke thënë se aktori gëzonte shëndet të plotë, edhe pse me zor peshonte 50 kilogramë.