Vdekja e Whitney Houston është shkaktuar nga mbytja aksidentale, por përdorimi i drogës dhe sëmundja e zemrës ishin gjithashtu faktorë, njoftoi mjeku ligjor, pas rezultatit të analizave.

Zëdhënësi i mjekut ligjor tha se testet e drogës treguan se këngëtarja 48-vjeçare amerikane ka qenë një përdoruese kronike e kokainës. Drogëra të tjera të gjetura në gjakun e saj ishin marihuana,  një drogë kundër-ankthit, një relaksant muskujsh dhe një mjekim për alergji.

Njoftimi në këtë mënyrë u jep fund spekulimeve mbi shkakun e vdekjes së Houston.

Por ajo që mbetet ende një pikëpyetje, është se kush i fshehu mjetet që Houston kishte përdorur për marrjen e kokainës? Materialet të cilat janë të paraqitura edhe në fotografi, janë zbuluar nga burime të tabloidit amerikan TMZ, fakte të cilat ishin zhdukur nga dhoma e këngëtares pak para se të mbërrinin autoritetet policore.

Ajo u gjet zhytur në banjën e hotelit të saj në Los Angeles, në prag të ceremonisë të “Çmimeve Grammy” më 11 shkurt të këtij viti. (LajmeShqip.com)