Lajme Shqip Saturday, 04 June 2011 15:26

Prishtinë – Lëvizja Vetëvendosje konsideron se Strategjia e Qeverisë së Kosovës për veriun ka dështuar.

Xhelal Sveçla, nga Vetëvendosje, tha se raporti i Zyrës së koordinatorit për strategjinë e veriut lidhur me institucionet paralele në veri, është një raport i dështuar, i cili veç sa i faktorizon më tepër strukturat paralele në veri.

Ai tha se ky raport nuk është strategji, por një pasqyrim i gjendjes në veri.

Ndërsa Zgjim Hyseni, që prezentoi përmbajtjen e raportit,  tha se është absurde që Serbia angazhon me qindra njerëz për të mbrojtur diçka që nuk është e saj, ndërkohë që shtoi se Qeveria e Kosovës, me anë të dy-tre personave, mundohet të mbrojë diçka që është e saj.

Ndërkohë, Xhevat Sveçla paraqiti hapat që duhet të ndërmerren lidhur me veriun.

Vendosja e policisë speciale në veri, rivendosja e kontrollit kufitar, inicimi i procedurave penale ndaj personave në strukturat paralele, ishin disa hapat që u rekomanduan nga Vetëvendosje.

Vetëvendosje thotë se publikimi i raportit mbi veriun po bëhet në kohën kur janë intensifikuar deklaratat e zyrtarëve serbë për ndarjen e Kosovës dhe, kur, siç tha ai, zyrtarët e Kosovës thonë se nuk kanë kontroll në veri.