Lajme Shqip Thursday, 16 June 2011 12:21

Tiranë – Kryetari i Prezencës së OSBE-së në Shqipëri, Ambasadori Eugen Wollfarth, shprehu shqetësimin e tij rreth zhvillimit të procesit të Gërdecit.

“Prezenca e OSBE-së në Shqipëri po ndjek nga afër procesin penal që po zhvillohet rreth të ashtuquajturës çështje të Gërdecit, seanca e 152-të e së cilës u mbajt më 15 qershor”, u shpreh Wollfarth.

Sipas tij, ky proces duket se nuk po zhvillohet në përputhje të plotë me parimet e gjykimit të drejtë, të mishëruara në Kushtetutë dhe në ligjet e tjera përkatëse të vendit.

“Ndërsa të pandehurit gëzojnë të drejtën themelore të mbrojtjes ligjore, mosparaqitja e përsëritur e avokatëve mbrojtës nëpër seanca përbën një abuzim të çdo sistemi drejtësie”, theksoi Wollfarth.

“Seanca e fundit nuk është veçse një tjetër dëshmi e këtij fakti, duke pasur parasysh se seanca zgjati vetëm 20 minuta, pasi gjykata e shtyu procesin për shkak të mungesës së shumicës dërrmuese të të pandehurve dhe avokatëve mbrojtës”, tha Wollfarth duke iu referuar seancës së djeshme e cial u shty si pasojë e mungesës së avokatëve.

“Kanë kaluar tre vjet nga tragjedia e Gërdecit, dhe me gjithë përpjekjet e konsiderueshme që ka bërë trupi gjykues për të planifikuar mbajtjen e seancave një herë në dy ditë, procesi duket se është shumë larg finalizimit dhe shumica e seancave nuk janë zhvilluar”, theksoi Wollfarth.

Sipas tij, “vonesat e vazhdueshme nuk bëjnë gjë tjetër veçse e cenojnë besimin aq shumë të nevojshëm te sistemi i drejtësisë dhe më gjerësisht te shteti i së drejtës në Shqipëri, sidomos në këtë çështje kaq delikate”.

Kryetari i Prezencës së OSBE-së në Shqipëri, Ambasadori Eugen Wollfarth u bëri thirrje të gjitha autoriteteve përkatëse të drejtësisë që të ndërmarrin të gjitha përpjekjet e mundshme, brenda kuadrit ligjor, për të garantuar përmbylljen e shqyrtimit të drejtë dhe publik të kësaj çështjeje brenda një periudhe të arsyeshme kohore.