|
|
e Enjëte, 09 Gusht 2012 15:51 
Mitrovicë - Mitrovicë, 9 gusht (E plotësuar) – Barrikada në urën mbi Ibër është një simbol i fuqishëm politik. Kjo është një barrikadë e turpit që karakterizon dhe paraqet qytetin e ndarë. Në realitet qytetarë janë kundër saj. Këto janë komentet që i bëri komandanti i KFOR-it, gjenerali gjerman, Erhard Drews, gjatë takimit të sotshëm me kryetarin e Komunës së Mitrovicës, Avni Kastratin.
“Barrikada në urën kryesore mbi lumin Ibër përbën një simbol të fuqishëm politik. Ne (KFOR-i) atë mund ta largojmë me forcë, por kjo nuk do të kuptohej mirë nga ata persona që e kanë vendosur. Pra nuk do të ndërronte asgjë në mendjet e tyre”, ka thënë Drews. “Barrikadat që është vendosur në urën kryesore mbi lumin Ibër është barrikadë e turpit, që i jep karakter të ndarjes së qytetit, por realiteti tek qytetarët është tjetër, sepse ata nuk e donë një gjë të tillë”, ka thënë komandanti i KFOR-it. Ai ka shtuar se kjo barrikadë duhet të largohet sa më shpejtë që të jetë e munduar. Por ai nuk ka dhënë një afat se kur do të bëhet kjo. Drews me tej ka shtuar se si vlera kryesore e BE-së është lëvizja e lirë dhe se një barrikadë e tillë në mes të qytetit është kundër këtyre vlerave dhe parimeve që ka BE-ja.
Duke folur për paralajmërimet për bisedime politike në mesë të Kosovës dhe Serbisë, Drews ka theksuar se personalisht mendon se së pari duhet të zbatohen në terren marrëveshjet që janë arritur, e pastaj të punohet për të tjetra.
Duke iu përgjigjur kritikave që kanë ardhur nga shefi i OKB-së dhe Qeveria e Kosovës se KFOR-i dhe EULEX-i nuk e kanë kryer punën e tyre, për çka janë të thirrura, gjenerali Drews tha se nuk është me rendësi nëse Qeveria e Kosovës është e kënaqur apo jo me punën tonë, me rëndësi është që me punën time të jenë të kënaqur ata që më japin urdhra, duke aluduar në komandën e NATO-s ën Bruksel. “Ne i kemi punët më së mirë kur të dy palët, pra shqiptarët dhe serbët janë të pakënaqur me ne”, është shprehur Drews në Mitrovicë. Sa i përket mosmbylljes së rrugëve ilegale, që janë hapur nga grupet kriminale serbe vitin e shkuar, ai rikujtoi se “Kosova është një zonë doganore”.
Organizata e Kombeve të Bashkuar në vitin 2008 ka konfirmuar se Kosova është një zonë doganore dhe atëherë për këtë nuk ka reaguar as Serbia, pra kjo duhet të respektohet. Bashkësia ndërkombëtare duhet të punojë dhe Serbia duhet ta respektojë që kjo zonë doganorë duhet të funksionojë, duke mbyllur të gjitha rrugët ilegale. Kufiri nuk mundet të kontrollohet vetëm nga një palë, por ketë duhet ta bëjnë edhe fqinjët, ka thënë Drews.
Kryetari i Komunës së Mitrovicës, Avni Kastrati, ka theksuar se me komandantin e KFOR-it kemi biseduar për largimin e barrikadës në urën kryesore mbi lumin Ibër, si dhe për mbylljen e rrugëve ilegale në veri, të cilat po i dëmtojnë më së shumti qytetarët e Kosovës.
Pantiq, gjeneralit Drews: Barrikada – simbol i rezistencës ndaj dhunës
Politikani serb nga pjesa veriore e Kosovës, Kërstimir Pantiq i ka hedhur poshtë konstatimet e komandantit të KFOR-it Erhard Drews, se barrikada në Mitrovicë është “e turpshme”, por ka vlerësuar se ajo është simbol i rezistencës së serbëve ndaj dhunës nga Prishtina.
Ky politikan i ka thënë agjencisë Beta se barrikada në urën kryesore në lumin Ibër, që Mitrovicën e ndanë në dy pjesë, është vendosur pas “aksioneve të njëanshme dhe të dhunshme të Prishtinës dhe është pasojë e dhunës e cila tash e 13 vjet ushtrohet ndaj serbëve në Kosovë”. Pantiq më tutje ka theksuar se KFOR-i mund të provojë që me dhunë ta largoj barrikadën, por qytetarët nuk do të pajtohen lehtë, përderisa nuk marrin garanci të forta se Prishtina asnjëherë më nuk do të përpiqet që me dhunë t’i vendosë institucionet e saj.
Më herët gjatë ditës, komandanti i KFOR-it, Erhard Drews, pas vizitës në pjesën jugore të Mitrovicës dhe takimit me kryetarin e Komunës, Avni Kastrati, u tha gazetarëve se barrikada në urë është “e turpshme” dhe se ajo paraqet simbol të ndarjes së qytetit. (LajmeShqip.com)