|
|
e Premte, 31 Gusht 2012 14:29 
Prekaz (PLOTESUAR 31 GUSHT, 15:30)– Presidenti i Shqipërisë, Bujar Nishani, ka vizituar sot Familjen e komandantit legjendar, Adem Jashari, në Prekaz. Ai është pritur nga Rifat Jashari. Me ta përfunduar bisedën në kullë, për media presidenti Nishani ka deklaruar: “Është emocionale të shohim se si sakrificat e mëdha dhe sublime që u bënë nga komandant Adem Jashari, nga të gjithë luftëtarët që ranë për liri, sot janë kthyer në një realitet, i cili na motivon për të ecur të gjithë përpara nga e ardhmja dhe nga zhvillimi”.
Murat Jashari, ndërkaq, tha se ishte ndjenjë e veçantë që te kemi mysafir presidentin e Shqipërisë në 100 vjetorin e shpalljes se pavarësisë. “Kërkuam qe në këtë 100 vjetor shqiptarët të jenë më stabil politikisht, më të qëndrueshëm ekonomikisht dhe që t’iu kthehemi vlerave tona dhe vetvetes, sepse duke u kthyer në bazament ecja jonë do të jetë më e sigurt”, tha Jashari.
Ai në fund ka porositur shqiptarët kudo që janë, që në ketë 100 vjetor dhe ne të bëjmë vepra kapitale, në mënyrë që brezat që vijnë të na kujtojnë edhe neve, ashtu siç ne i kujtojmë brezat e mëparshëm. (LajmeShqip.com)
*************************************************
Prishtinë – Presidenti i Shqipërisë, Bujar Nishani, në ditën e dytë të vizitës në Kosovës ka mbajtur një ligjëratë në një Universitetin AAB, në të një vend të rëndësishëm zuri reforma në drejtësi, të cilën e cilësoi si një nga betejat më vitale që duhet të fitohet me çdo kusht.
“Beteja për drejtësi më vitale që duhet ta fitojmë me çdo kusht, institucionet e Drejtësisë sa më shumë të mbetet të pavarura aq më shumë objektive do jenë”- theksoi në fjalën e tij Presidenti shqiptar.
Nishani vlerësoi përpjekjet e rilindasve shqiptarë në ringjallen e shtetit shqiptar në 100 vjet, ndërsa shprehu nevojën për formimin e arsimit me standarde evropiane, i cili i shërben dijes, rritjes së standardit të jetesës dhe mirëqenies, nëpërmjet modernizimit, dixhitalizimit dhe kërkimit shkencor.
“Jetojmë në kohë globale dhe është e domosdoshme të kapim kohën globale të dijes, të formojnë arsimin me standarde evropiane. Për të qenë kompetitivë në botën e dijes ju jeni më të vetëdijshëm për sfidat që dija dhe shkenca duhet të përballojë për të përgatitur mësues që ta bëjnë Kosovën, Shqipërinë dhe mbarë shqiptarët konkurrues anembanë botës”-vijoi presidenti Nishani i cili shtoi se niveli i zhvillimit shkencor përcakton zhvillimin e një vendi.
Duke iu referuar bashkëpunimit mes dy vendeve Nishani tha se infrastruktura moderne që kemi ndërtuar lehtëson lëvizjen e lirë të njerëzve, të mallrave dhe të bashkëpunimit intensiv në të gjitha fushat. Për këtë ai iu referua Rrugës së Kombit në sajë të së cilës është rritur 11 herë qarkullimi i njerëzve dhe 5 herë qarkullimi i mallrave, duke krijuar unifikim të tregut.
“Ka ende shumë vend për rritjen, zgjerimin dhe intensifikim e shkëmbimeve tregtare, krijimin e tregut energjetik, unifikim i teksteve shkollore. Shkëmbi tregtar 140 milionë euro në vit është ende i ulët”- vijoi ai.
Një vend të rëndësishëm gjatë ligjëratës së kreut të shtetit shqiptar zuri edhe procesi integrues rajonal, ku sipas tij shqiptarët duhet të shohin nga e ardhmja dhe do jenë të bashkuar një ditë në BE.
“Pa harruar të shkuarën, duke falur ne shohim drejt të ardhmes duke respektuar e mos harruar dhimbjet e të shkuarës dhe rruga e vetme pa alternativë janë fqinjët me të cilët na ndan e shkuara, po na bashkon e ardhmja. Dialogu mbete arma më e fuqishme për të luftuar për të ardhmen tonë. Kosova e pavarur është realitet i pakthyeshëm, e cila është shndërruar në faktor paqeje dhe stabiliteti në Ballkan”-nënvizoi Nishani.
Ai tha se çështja e statusit është e mbyllur dhe se Shqipëria mbështet tërësinë territoriale të Kosovës, ndërsa çdo tentativë për hapjen e tyre kthen kohën mbrapa dhe cenon të ardhmen. Sipas tij vendimi i GND hapi kapitullin e shtetit të Kosovës sovrane dhe të pavarur.
Gjithashtu Nishani u shpreh se Shqipëria ka një politikë të jashtme të balancuar në shërbim të paqes dhe stabiliteti në rajon.
Thaçi pret Nishanin: Bashkëpunimin ekonomik
Zhvillimet aktuale politike në Kosovë dhe në rajon, bashkëpunimi ndërshtetëror mes Kosovës dhe Shqipërisë, si dhe procesi i integrimit evropian të dy vendeve kanë qenë temat në fokus të takimit mes Presidentit të Republikës, Bujar Nishani dhe kryeministrit të Kosovës, Hashim Thaçi.
Ndërsa po qëndron në Kosovë, në vizitën e tij të parë në këtë cilësi, gjatë takimit më Thaçin, Nishani ka theksuar se, forcimi i marrëdhënieve të gjithanshme ndërshtetërore mes Kosovës dhe Shqipërisë është në interes strategjik të të dyja vendeve.
Në të njëjtën linjë, kryeministri Thaçi theksoi se bashkëpunimi mes dy vendeve është i shkëlqyer dhe do të thellohet edhe më tej në fushat me interes të përbashkët, duke u fokusuar në bashkëpunimin ekonomik.
“Suksesi i Kosovës në këto 4 vite e gjysmë të shtetësisë së saj është meritë e përkushtimit të institucioneve shtetërore të Kosovës, i unitetit politik dhe qytetar për të çuar përpara proceset zhvillimore dhe integruese të Kosovës. Pas përmbylljes së mbikëqyrjes ndërkombëtare të pavarësisë, prioritet kryesor vazhdon të mbetet përshpejtimi i agjendës së integrimit të Kosovës në BE dhe në NATO – theksoi kryeministri Thaçi.
Gjatë takimit, kryeministri Thaçi i ka bërë një ekspoze të të arriturave të shtetit të Kosovës që nga shpallja e pavarësisë deri në periudhën e tanishme, kur edhe zyrtarisht po përmbyllet procesi i mbikëqyrjes ndërkombëtare të pavarësisë së Kosovës. (LajmeShqip.com)
