|
|
e Premte, 23 Dhjetor 2011 10:05 
Hagë – Gjykata ndërkombëtare e Hagës ka refuzuar kërkesën e avokatëve të ish-kryeministrit të Kosovës, Ramush Haradinaj, për lirim të përkohshëm të tij.
Në kërkesën e mbrojtjes thuhej se Haradinaj kërkon pushim të përkohshëm nga 16 dhjetori deri më 8 janar 2012, sipas kushteve të propozuara, ose siç urdhëron Dhoma e Gjykatës, raportojnë mediat kosovare.
Avokatët kanë siguruar gjykatën se gjatë lirimit të përkohshëm Haradinaj do të qëndrojë vetëm në shtëpinë e tij në Prishtinë dhe nuk do të bëj asnjë deklaratë publike, e as nuk do të përfshihet në ndonjë aktivitetet politik.
Tribunali i Hagës në vendim e saj vlerëson se një kërkesë e tillë mund të cënojë proçesin e rigjykimit të pjesshëm.
Gjykimi ndaj Ramush Haradinajt, njëherësh lider i Aleancës për Ardhmërinë e Kosovës, është shtyrë më 13 shkurt të vitit 2012. Ish-kryeministri i Kosovës, Ramush Haradinaj i cili qe shpallur i pafajshëm në prill të vitit 2008, u nxor sërish në muajin gusht në gjykatën e Hagës për krime lufte për një rigjykim të pjesshëm bashkë me dy ish-bashkëluftëtarët e tij, Idriz Balaj e Lahi Brahimaj. Të tre akuzohen për vrasje, torturë dhe trajtim mizor, si krime që bien ndesh me ligjet dhe zakonet e luftës.