|
LajmeShqip.com
 Kombëtare (Plotësuar 2) Nenet 37 dhe 38, Kuçi jep dorëheqjen, Zhbogar: I zhgënjyer prej Kuvendit |
e Premte, 22 Qershor 2012 14:02 
Prishtinë (PLOTESUAR 15:55)- Zhbogar, i zhgënjyer me vendimin e Kuvendit.
Përfaqësuesi i posaçëm i Bashkimit Evropian në Kosovë, Samuel Zhbogar, është shprehur i zhgënjyer me vendimin e Kuvendit të Kosovës për të mbajtur në fuqi nenet 37 dhe 38 të Kodit Penal, të cilat zhvlerësojnë lirinë e medias.
Zoti Zhbogar citohet të ketë thënë nëpërmjet një komunikate të lëshuar nga zyra e tij se nenet në fjalë janë në kundërthënie me konventat e BE-së që mbrojnë lirinë e medias dhe lirinë e të shprehurit. “Provizionet për përgjegjësinë penale dhe burimin e informacionit do të kenë një ndikim negative në lirinë e shprehjes dhe lirinë e medias në Kosovë”, ka thënë Zhbogar, duke rikujtuar se BE mbetet thellësisht e përkushtuar në promovimin dhe ruajtjen e lirisë së shprehjes dhe medias, si vlera të një rëndësie të veçantë për konsolidimin e demokracisë së Kosovës. (LajmeShqip.com)
******************************************
Prishtinë (PLOTESUAR 15:00)- Ashtu si kishte paralajmëruar, zëvendëskryeministri Hajredin Kuçi dha dorëheqje nga postet politike në Qeverinë e Kosovës. 
Ai njoftoi kështu në konferencën e shtypit që e mbajti ashtu si kishte premtuar pak çaste më parë, njofton KTV. Shkas për dorëheqje ishte miratimi i Kodit Penal me nenet 37 dhe 38 që ishin kontestuar nga mediet, shoqëria civile dhe Presidenca. (LajmeShqip.com)
*********************************
Prishtinë – Kuvendi i Kosovës nuk ka miratuar heqjen e neneve 37 dhe 38 të Kodit Penal, të cilat kanë të bëjnë me sanksionimin e shpifjes dhe zbulimin e burimit të informacionit, në rastet kur bëhet fjalë për procedime kriminale.
Presidentja e Kosovës, Atifete Jahjaga, më 8 maj, ka marrë vendim që Kodin Penal t’ia kthejë Kuvendit të Kosovës për rishqyrtim, duke thënë se “Neni 37 dhe Neni 38 i Kodit Penal janë në kundërshtim të plotë me Nenin 40 dhe Nenin 42 të Kushtetutës së Republikës së Kosovës, që rregullojnë lirinë e shprehjes dhe lirinë e mediave, si dhe me Nenin 22.2 të Kushtetutës së Republikës së Kosovës, që obligon përmbushjen e Konventës Evropiane për mbrojtjen e të Drejtave dhe Lirive Themelore të Njeriut dhe Protokollet e saj”.
Andaj, një qëndrim i tillë i presidentes ishte kuptuar si kërkesë për heqjen e këtyre neneve nga Kodi Penal. Po ashtu, edhe Komisioni Funksional kishte propozuar heqjen e këtyre neneve. Mirëpo, procedura e votimit ka sjellë si rezultat 59 vota për, 4 kundër dhe 5 abstenime.
Kryesuesi i seancës, Sabri Hamiti, tha se kërkesa e presidentes nuk miratohet, pasi që kërkohen 61 vota. Me këtë vendim është shprehur “i tmerruar” Asociacioni i Gazetarëve Profesionistë të Kosovës (AGPK).
“AGPK konsideron se me këtë vendim, Kuvendi e ka fundosur lirinë e shtypit në Kosovë. Votimi i deputetëve tregon për papjekuri politike dhe tendenca diktatoriale ndaj lirisë së shtypit dhe të shprehjes në Kosovë”, thuhet në reagimin e këtij asociacioni.
Kodi Penal është miratuar nga Kuvendi i Kosovës në seancën plenare, më 20 prill të këtij viti. Ai ka zgjuar më pas reagime e protesta të gazetarëve dhe mediave, të cilat kanë konsideruar se si i tillë, ky Kod, përkatësisht këto dy nene, cenojnë dhe rrezikojnë punën e tyre. (LajmeShqip.com)
